പതിവ്

ഇടക്ക് മാത്രം തെളിയുകയും
മിക്കവാറും കണ്ണടച്ചിരിക്കയും
ചെയ്യുന്ന വഴിവിളക്കുകളാണ്
എന്റെ പതിവുകളുടെ പാതകളിൽ

അവിടെ
സംഗീതത്തിനും നിലവിളിക്കുമിടയിലെ
നിശ്ശബ്ദതയും
സൗഹൃദത്തിനും ശത്രുതക്കുമിടയിലെ
നിസംഗതയും
വിരസതയുടെ കരിനിഴൽ വീഴത്തുന്നു.

എങ്കിലും
മഞ്ഞിന്റെ തിരശ്ശീലക്കപ്പുറത്തു നിന്നും
ഇരുളിന്റെ കടൽ താണ്ടി വരുന്ന
തണുത്ത കാറ്റിന്റെ ഉറവിടം തേടി
ഞാൻ നടപ്പ് തുടരുന്നു

നനഞ്ഞ ഉഷ്ണത്തിന്റെ പാളികൾ
വകഞ്ഞ് മാറ്റി
കാറ്റെന്നെ ആശ്ലേഷിച്ച് കടന്ന് പോകുന്നു.